Carlos Labraña. Fonte: Fundación SGAE
A obra Mambrú volveu da guerra valeulle ao dramaturgo Carlos Labraña facerse co Premio SGAE de Teatro Infantil na súa vixésimo terceira edición. Esta é a primeira ocasión en que un texto en galego consegue facerse con este premio, ao que concorreron 39 orixinais. O galardón, dotado con 8.000 euros, inclúe ademais a publicación e a posta en escena da obra.
A Fundación SGAE, que convoca este certame, destacou da obra gañadora "o seu transfundo de recoñecemento á memoria histórica, a todos aqueles esquecidos en cunetas e tapias de cemiterios" ao tempo que recoñece a súa "gran dozura literaria e escénica".
A obra narra a historia de Xana, unha nena que chega a un novo parque infantil das afora onde atopa un vello soldado de louza. A partir de aí, o autor desenvolve a súa reivindicación da memoria histórica cara ao que o xurado considerou "un fermoso e inesperado desenlace".
O comité de selección desta xeira estivo presidido por Rafael Alcaraz e composto por Sara Pinet, Puri Fariza, Juan Rodríguez Santiago e Pablo Cruz.
