Integrantes da asociación NOGA.
30 profesionais da narración oral galega integran NOGA, a Asociación de Narración Oral Galega, constituída o pasado 1 de outubro no marco do FIOT de Carballo. A asociación, primeira entidade formal que reúne ao amplo colectivo galego de contacontos profesionais, partiu desde a idea da "dignificación do traballo en termos de visibilidade e condicións laborais" así como co obxectivo de poder manter unha "interlocución coas institucións". NOGA tamén quere destacar no seu nacemento o "compromiso coa lingua galega" como "eixo imprescindible" por parte dos profesionais. A primeira directiva está integrada por Atenea García (presidencia), Vero Rilo (vicepresidencia), Beatriz Campos (tesourería), Olga Abad (secretaría) e Marta Ortiz e Caxoto como vogais.
