Mural de 3ttman realizado no marco do VIII Programa de Murais de Vigo
O IV Plan de Murais do Concello de Vigo, que se desenvolve baixo a marca Vigo, ciudad de color, contará na súa vindeira edición cun orzamento de 480.000 euros. Estes fondos financiarán a realización de entre 10 e 15 novos murais na cidade a cargo de diferentes artistas locais e internacionais. O programa suma xa case 150 obras espalladas pola cidade desde a súa primeira edición en 2015.
Con este proxecto o Concello "quere contribuír ao proceso de recuperación e revitalización da contorna urbana e comercial e da paisaxe urbana, poñendo en valor o patrimonio da cidade, amais de dar a coñecer a obra dos artistas urbanos". Na edición de 2022, dotada co mesmo orzamento que a actual, incorporáronse catorce novas obras ás paredes da cidade.
De xeito paralelo á nova xeira do programa, o Concello presentou as bases da IV Batalla Mural correspondente á VIII xeira do programa municipal. Este é un concurso de arte urbana no que a persoa gañadora poderá pintar un mural na cidade. O prazo de presentación de solicitudes está aberto ata o 17 de outubro.
