A exposición virtual Nuevos hallazgos en la catedral dá conta das descubertas arqueolóxicas máis recentes que se realizaron na Catedral de Santiago. A Fundación dedicada ao templo acaba de publicar no site Google Arts & Culture estes contidos a recoller os principais restos que apareceron durante as obras de restauración realizadas entre 2017 e 2021.
Entre outras pezas, a mostra achega fotografías e explicacións sobre plafóns e esculturas pertencentes ao coro pétreo do Mestre Mateo que se estaban a empregar como material de recheo, fragmentos de lauda sepulcral ou relevos que representan a Matanza dos Inocentes ordenada polo Rei Herodes, así como planos e vídeos dos achados. As pezas descubríronse durante as obras realizadas na escalinata principal e na cripta do Pórtico da Gloria.
