Viñetas desde o Atlántico fai 25 anos a repasar a súa traxectoria

O Concello da Coruña acollía este 2 de agosto a presentación da vixésimo quinta edición de Viñetas desde o Atlántico. O festival de banda deseñada conmemora este cuarto de século de actividade a repasar a evolución da novena arte neste tempo a través dunha vintena de sinaturas de importancia estatal e internacional.

Segundo explicou o director do evento, Miguelanxo Prado, na presentación, a intención do programa era que "que tanto os convidados como as exposicións de Viñetas 2022 amosasen unha mestura da nostalxia daqueles primeiros anos; que plasmasen a satisfacción do camiño percorrido por Viñetas e, por que non dicilo, tamén o orgullo que nos cabe polos resultados obtidos".

Deste xeito, entre os nomes que estarán presentes no evento atópanse artistas do país que coñeceron o festival na súa infancia e mocidade, como Alicia Jaraba, Emma Ríos e David Rubín. Canda a eles, autores que comezaban hai dúas décadas a súa carreira e que agora están consagrados a nivel mundial como Juanjo Guarnido e Juan Díaz Canales, autores da aclamada serie Blacksad. O evento contará tamén coa presenza de Jesús Alonso Iglesias, que ademais de autor de BD foi responsable da imaxe do filme de animación Spiderman. Un novo universo.

A ollar as novas sinaturas nesta arte, o programa contará con autoras e autores de actualidade no mercado estatal como son Fernando de Felipe, Borja González, Mayte Alvarado ou Fidel de Tovar e Dani Bermúdez, ademais do francés Pierre Alary, autor da aclamada obra Don Vega. O dúo creativo formado polo guionista galego Carlos Portela e o debuxante Sergi San Julián presentarán no festival a obra A conta atrás, por fin finalizada logo que a súa primeira parte se publicara en 2008.

Para alén das mostras individuais dedicadas a cada persoa convidada, o festival desenvolverá a exposición colectiva comisariada por Toni Guiral Viñetas: a ciencia dos océanos que se poderá ver no Aquarium Finisterrae. Tamén se exporán os orixinais do Premio Castelao de Banda Deseñada 2021 e mais da obra María Casares. En tres actos de Inés Vázquez, Rubén Rial e Dani Xove, con guión de Manuel L. Poy.

Como é habitual no evento, unha trintena de librarías especializadas de todo o estado e diferentes editoriais contarán con espazos propios para vender os seus produtos e dar a coñecer as súas novidades. Ademais, correos emitirá un selo conmemorativo a reproducir o deseño orixinal de Miguelanxo Prado para o cartel desta xeira, que homenaxea o debuxo da primeira edición. As acatividades desesnvolveranse entre os días 8 e 14 de agosto.

Segundo destacou Prado na presentación do evento, "é difícil conseguir un salón coma este, onde o que prima sexa a mostra dos debuxos orixinais; e iso só é posible grazas á sona que nos gañamos no sector, coidando do autor e mais da súa obra, o que sería imposible sen o traballo que fai dende hai 25 anos o equipo municipal responsable das salas de exposicións". Segundo recoñeceu, o obxectivo desde o principio, foi facer de Viñetas un salón de autor, onde o encontro sosegado entre os afeccionados e os creadores fose posible.