O 'ano Faraldo' destaca en Betanzos

A área de Normalización Lingüística da Deputación da Coruña promove os Xogos Florais que os vindeiros 26, 27 e 28 de agosto celebrarán en Betanzos o legado de Antolín Faraldo. Actuacións literarias e musicais, un slam poético para menores de 35 anos e un concurso xornalístico será o centro da programación que busca chamar a atención sobre a "obra e traxectoria do escritor e xornalista Antolín Faraldo". Faraldo foi un dos máis destacados activistas que participaron na revolución provincialista de 1846 que remataría cos fusilamentos de Carral. Os xogos florais complementaranse con "pequenos audiovisuais" que abordarán temáticas tratadas por Faraldo nos seus textos xornalísticos como a liberdade de imprenta, o suicidio, feminismo, a mellora das comunicacións internas en Galicia e a organización territorial do Estado.