Neste Ano da memoria, o presidente da Real Academia Galega (RAG), Xosé Ramón Barreiro Fernández, instou a necesidade de recoñecer os mártires para normalizar o noso país. Por iso, mentres a conselleira Ánxela Bugallo e Barreiro Fernández asinaban un convenio polo que cultura achega 100.000 euros aos actos de celebración do centenario da RAG, comentaron que estaban a barallar a posibilidade de fixar o 17 de agosto como Día da Galicia Mártir. Os actos da Academia continuaron esta fin de semana en Tui coa conmemoración do 115 aniversario dos Xogos Florais, o primeiro foro no que se reivindicou o uso público do galego. Mentres tanto, o académico Xesús Ferro Ruibal anunciou en Lugo que a RAG tentaría reunir os estudos sobre toponimia de Nicandro Ares.
Máis información sobre o recoñecemento dos mártires en Galicia Hoxe, sobre os Xogos Florais en La Voz de Galicia e sobre o anuncio sobre os estudos de Nicandro Ares en El Progreso deste sábado