As subvencións á creación escénica chegan a vinte e oito compañías profesionais

Novos espectáculos de 28 compañías profesionais galegas resultaron beneficiados da convocatoria de subvencións á creación escénica de 2022. Os fondos destinados a esta liña de axudas da Consellería de Cultura, Educación, FP e Universidades ascenden a 800.000 euros, que se repartirán entre as sete propostas escollidas na modalidade de compañías de recente creación, as cinco seleccionadas no campo da danza e das arte do movemento e as 15 elixidas do ámbito xeral que engloba as producións de maxia, teatro e novo circo. A este cómputo cómpre sumarlle o proxecto beneficiario no apartado de actividade escénica de carácter plurianual. A través desta última categoría, procúrase facilitar unha planificación a medio prazo das actividades das compañías. Elefante Elegante é a única adxudicataria desta modalidade, polo que recibirá 100.000 euros para desenvolver a súa folla de ruta, ideada para o período comprendido entre o 2022 e o 2024 coas montaxes de Kyoki e 'Un momento precioso', ademais de continuar coa distribución de 'Alma de tigre' e doutros espectáculos do seu repertorio. Dos 200.000 euros orzamentados para esa categoría de actividade escénica de carácter plurianual só se rexistrou esta petición de Elefante Elegante, polo que o remanente da partida (100.000 euros) repartiuse entre as outras tres modalidades nas que si había máis peticións que orzamento inicial.

Os proxectos escénicos de sete compañías de recente fundación recibirán axudas da liña específica para esa modalidade. As beneficiarias nesta categoría son Stracciatella Teatro para a obra 'O refuxio. Unha comedia sobre o triste que é todo', Sonsoles Cordón por parte da compañía Olivas Negras para 'O rapto de Befana', Rafael Rey Domech da compañía Moving Compass para a produción 'Papi Facebook. A era do like', Greta Marí para 'The Great Greta' e Iván Davila da compañía Negro López para o proxecto Backstage. Pechan a relación de beneficiarias Antela Cid, de Compañía Humana, para 'Ifixenia na porta do súper' e Carmen García Facorro, por parte de Amorodio Teatro, para 'La Madre'.