Volta o Abride a fiestra á Fundación Rosalía o 17 de xullo

Leilía, LaMontagne & PicoAmperio e Brais das Hortas fan parte do programa

Leilía, LaMontagne & PicoAmperio e Brais das Hortas fan parte do programa
A Casa de Rosalía de Castro en Padrón acolle este domingo 17 de xullo a cuarta edición do festival Abride a fiestra. As propostas musicais de Leilía, que celebra o seu 30 aniversario, LaMontagne & PicoAmperio e, para o público familiar, Brais das Hortas, encabezan o cartel con actuacións musicais.

No programa, Pepe Carreiro estará debuxando a Rosalía na Horta da Casa da Matanzak haberá regueifas da man de Luís O Caruncho e Lupe Blanco, un recital poético a cargo de Rompente, unha conversa con Xesús Fraga e outra entre Xurxo Martínez e Henrique Alvarellos sobre a figura de Antolín Faraldo.

O artista Antón Patiño presentará a súa obra A mirada atlántica, e proxectarase o filme A Rosa Incandescente. A presentación do proxecto Es ti que cantas, que converteu os textos de Rosalía en audiolibros, e un obradoiro de astronomía fan tamén parte da proposta.

Unha cata de viños da adega Paco & Lola e visitas guiadas pola casa e a horta de Rosalía da man de Pepe Barro, Manuel Lorenzo Baleirón, María Xosé Bravo, Carlos Dacal e Kathleen March completan esta intensa iniciativa.