Un miliario volve marcar o camiño de Asturica na Ponte Cigarrosa de Petín

O concello valdeorrés de Petín inaugurará nos vindeiros días a restitución dun miliario recuperado había uns meses nas proximidades da Ponte da Cigarrosa, en Petín. Así o conta hoxe o xornal valdeorrés Osil.info na súa edición de hoxe. O miliario foi restaurado e situado agora á entrada desta emblemática ponte valdeorresa. A peza arqueolóxica conserva aínda a embalaxe coa que chegou do obradoiro de restauración, ata agardar a inauguración oficial nos vindeiros días. Será neste acto onde se desvele o contido do epígrafe este marcador viario. Moitos dos miliarios existentes en Galicia sinalan tanto a distancia da vía como outras circunstancias, como o emperador que gobernaba no momento da reparación da vía ou da colocación do marco. Neste caso, trátase do primeiro miliario con epígrafe localizado na comarca de Valdeorras e pode estar asociado á Vía XIX ou Vía Nova, que comunicaba Bracara (Braga) e Asturica. Adiántase que o texto contén información histórica relevante, pero non será ata a inauguración no que se desvele o misteiro agochado baixo ese plástico.