Premio Vicente Risco para un ensaio sobre o republicanismo de Castelao

Un estudo sobre as relacións de Castelao co republicanismo, asinado por David Rodríguez Rodríguez foi designado gañador da XXVIª edición do Premio Vicente Risco de Ciencias Sociais. Reunido en Allariz, o xurado do galardón convocado pola Fundación Vicente Risco premiaba o traballo titulado "Liberdades antigas, tempos modernos: o republicanismo de Castelao" do ensaísta, poeta deseñador gráfico vigués David Rodríguez Rodríguez como merecedor deste recoñecemento por "ser un ensaio que desenvolve o divorcio entre o nacionalismo e o republicanismo en Castelao, non como algo pasado senón presente". Ademais os membros do xurado decidiron conceder un accésit á obra "O criado do pastor. Liçoes de serras invisíveis do Norte de Portugal em tempos de fogos do Antropoceno", asinado por Xulio Sa Rego. O accésit dá dereito de publicación, mentres que a obra premiada levará ademais unha dotación de 6.000 euros.