Imaxe da exposición de Narelle Jubelin
Este venres tres de xuño abría as súas portas no Centro Galego de Arte Contemporánea, en Santiago de Compostela, a exposición Nalgures. A artista australiana Narelle Jubelin asina esta proposta sobre a memoria da paisaxe na que, por vez primeira, mestura as súas creacións con creacións realizadas no país.
Fotografías de Ana Turbau, antigas pezas de Sargadelos, un poema de Ana Romaní ou un lavadoiro de Aguiño fan parte deste proxecto, no que tamén están presentes elementos de series anteriores de Jubelin, como Shumakom, Flamenco primitivo, The Presence of Black e Afterimage.
Coas súas creacións, a autora "detense nas memorias duns espazos, duns referentes obxectuais e literarios concretos dentro do contexto galego que vincula con outras cartografías e con referencias á súa propia biografía e á súa traxectoria artística", segundo explica a presentación da mostra, que "profunda na memoria da paisaxe e das construcións humanas habitacionais, pero tamén nos modos de ocupación espacial e na redefinición formal das distintas producións culturais" a nos situar "nunha indeterminación que está por definir, no interior dunhas xeografías fragmentarias: lugares, vestixios, modos de ocupación". A mostra poderá verse ata o vindeiro 16 de outubro.
