Unha historia de viaxes no tempo ambientada nunha Galicia futura. Esta é a proposta que fai Ángela Curro en Baixo o pantano, recente lanzamento de Demo Editorial. O debut desta autora é un álbum de 64 páxinas a toda cor. Pola súa banda, Retranca Editora presentou o segundo volume de Tam. A serie de manga realizada por Anémona de Río recupera a protagonista da primeira entrega nunha trama de celos e reencontro con antigos compañeiros de instituto.
Á súa vez, Zephyrum Ediciones continúa coa súa reedición da colección clásica de Tintín, e achega á nosa lingua unha nova tradución do álbum A illa negra. Realizada por Henrique e Breixo Harguindey, o volume é o cuarto dispoñible desta serie en galego.
