O Museo do Humor rende homenaxe a Xaquín Marín cunha mostra antolóxica

A exposición Volta á orixe pode verse en Fene entre o 6 de maio e o 27 de xuño acompañada de actividades divulgativas

Unhas 150 obras de diferentes xéneros compoñen Volta á orixe, a exposición antolóxica sobre o traballo de Xaquín Marín que se poderá ver no Museo do Humor de Fene entre os días 6 de maio e 27 de xuño. O proxecto recolle unha selección de obras das seis décadas de carreira do autor en diferentes campos. Canda á exposición principal, o Paseo de San Valentín da localidade acollerá unha mostra específica sobre o personaxe Isolino, que se poderá ver no mesmo período.

Ademais das obras, o proxecto contempla unha serie de actividades paralelas, que comezarán o 6 de maio coa asignación do nome do autor ao salón de actos do IES de Fene e mais unha visita con el á mostra sobre Isolino. O evento incluirá un encontro de Marín co alumnado e persoal do centro. O xoves doce de maio o autor manterá outro encontro aberto co investigador Félix Caballero, e na data de feche desenvolverá unha conversa co pintor Antón Patiño e o deseñador Pepe Barro.

O programa inclúe tamén un obradoiro de debuxo urbano e outro de porexgrafía, visitas guiadas á mostra e o desenvolvemento de dúas visitas virtuais, unha ao conxunto do museo e outra específica sobre a exposición, que se fará pública o 27 de xuño. A coincidir con esta proposta, o Concello de Fene recuperará o mural das Pías, pintado orixinalmente pola Asociación de Amigos do Museo do Humor no ano 1996, a partir dun deseño de Xaquín Marín.