Ata 14 espectáculos son finalistas para os XXVI Premios de Teatro María Casares

'Cigarreiras' e Othello son as montaxes con máis candidaturas e o CDG acada 9 finalistas con tres producións propias

'Cigarreiras' e Othello son as montaxes con máis candidaturas e o CDG acada 9 finalistas con tres producións propias
Foto de familias dos finalistas dos premios Foto: AAAG / LaDiapo.
Un total de 14 espectáculos competirán en calidade de finalistas por facerse con algún dos catorce galardóns que se entregarán durante a gala dos XXVI Premios de Teatro María Casares organizados pola Asociación de Actores e Actrices de Galicia (AAAG), que este ano se celebrará o 2 de xuño no Teatro Rosalía Castro da Coruña. Así se deu a coñecer onte en Santiago durante a Festa de Finalistas 2022 que tivo lugar na Cafetería Lasso do Auditorio de Galicia. Podería decirse que este ano Emilia Pardo Bazán bótalle un pulso a William Shakespeare, xa que as obras máis recoñecidas en canto a candidaturas finalistas este ano son 'Cigarreiras', de Contraproducións e Teatre Romea e Othello, de Voadora. As dúas optan a 8 premios, competindo entre elas en cinco das categorías. Dos catorce espectáculos presentes na lista de finalistas sete deles aspiran a un só galardón.

Pola adaptación de 'La Tribuna' de Emilia Pardo Bazán que fan Contraproducións e Teatre Romea con 'Cigarreiras', os membros da asociación decidiron facelos finalistas nas categorías de maquillaxe, vestiario, escenografía, adaptación-tradución, actriz protagonista por partida dupla (Tamara Canosa e Susana Dans), dirección (Cándido Pazó) e espectáculo. A recuperación de Shakespeare que fai Voadora en Othello opta nos apartados de maquillaxe, vestiario, escenografía, iluminación, adaptación-tradución, música orixinal, actor secundario (Hugo Torres) e dirección (Marta Pazos).

A montaxe 'A lúa vai encuberta', de Incendiaria e A Quinta do Cuadrante en coprodución con Casa Museo Manuel María, CDG e MITFC acadou sete finalistas, dous deles para Tito Asorey como director e como actor secundario, ademais a dramaturxia de Vanesa Sotelo, que foi a gañadora do IIº Certame Manuel María de Producións Teatrais por este texto baseado nunha obra homónima e nunca representada do escritor chairego Manuel María, é finalista do galardón á adaptación/tradución. opta tamén a mellor espectáculo do ano, actor protagonista (Davide González), música orixinal (Davide González) e Iluminación (Laura Iturralde).

O CDG moi presente con tres producións propias
Pola súa banda, 'Terceiro Acto' da compañía pública galega, Centro Dramático Galego, rexistra nesta fase ata sete finalistas. Destaca o recoñecemento neste caso dos traballo dos intérpretes protagonistas, xa que Roberto Leal e Eduardo R. Cunha 'Tatán' compiten entre eles polo premio a mellor actor protagonista copando dúas das tres candidaturas e Belén Constenla é finalista na categoría de actriz protagonista. Marta Pazos é tamén finalista por esta montaxe en función da escenografía. A produción do CDG entra tamén na terna de finalistas a mellor espectáculo así como na de texto orixinal (Andrea Jiménez e Noemi Rodríguez). O CDG está tamén presente a través de outras dúas producións, 'O charco de Ulises', ao aspirar por partida dupla ao premio de actriz secundaria para Mónica Camaño e Raquel Espada e 'Seva me Servabo te', pola iluminación de Laura Iturralde. Contando coas tres producións propias o CDG resulta finalista en 9 categorías nestes XXVI Premios de Teatro María Casares.

O resto de finalistas deste ano distribúese dun xeito espallado entre oito espectáculos diferentes. Así 'Comando Comadres', de MatrioshkaTeatro, aspira a levar dous galardóns: maquillaxe e actriz secundaria, igual que Quixote, da compañía Pedras de Cartón, este espectáculo que gañou o Xº Certamen Internacional Barroco Infantil do festival de Teatro Clásico de Almagro que opta tamén o premio María Casares de espectáculo infantil ademais de ao de vestiario. Acadaron tamén un finalista as seguintes montaxes: 'Morgana en Esmelle', de Sarabela Teatro (actor secundario); 'A parábola do angazo', de Talía Teatro (texto orixinal); 'A cazola de Lola', de Tanxarina (música orixinal); 'Soga e cinsa', de Aporía Escénica (texto orixinal); Hugo, de Os Naúfragos Teatro (espectáculo infantil), e Cubo, de Elefante Elegante (espectáculo infantil).

Relación de finalistas por montaxes

1. Cigarreiras, de Contraprodución e Teatre Romea (8 finalistas): espectáculo, dirección (Cándido Pazó), actriz protagonista (Tamara Canosa e Susana Dans), adaptación/tradución (Cándido Pazó), escenografía (Dani Trillo), vestiario (Martina Cambeiro) e maquillaxe (Martina Cambeiro).

2. Othello, de Voadora (8 finalistas): dirección (Marta Pazos); actor secundario (Hugo Torres), adaptación/tradución (Fernando Epelde), música orixinal (Hugo Torres), iluminación (Nuno Meira), escenografía (Marta Pazos), vestiario (Silvia Delagneau) e maquillaxe (Silvia Delagneau).

3. A lúa vai encuberta, Incendiaria e A Quinta do Cuadrante (7 finalistas): espectáculo, dirección (Tito Asorey), actor protagonista (Davide González), actor secundario (Tito Asorey), adaptación/tradución (Vanesa Sotelo), música orixinal (Davide González) e Iluminación (Laura Iturralde).

4. Terceiro acto, do Centro Dramático Galego (6 finalistas): espectáculo, actor protagonista (Roberto Leal e Eduardo R. Cunha ‘Tatán), actriz protagonista (Belén Constenla), texto orixinal (Andrea Jiménez e Noemi Rodríguez) e escenografía (Marta Pazos)

5. O charco de Ulises, do Centro Dramático Galego (2 finalistas): actriz secundaria (Mónica Camaño e Raquel Espada)

6. Comando Comadres, de Matrioshka Teatro (2 finalistas): actriz secundaria (Anabell Gago) e maquillaxe (LaPelu F.Silva)

7. Quixote, de Pedras de Cartón (2 finalistas): vestiario (Diego Valeiras) e espectáculo infantil.

8. A parábola do angazo, de Talía Teatro (1 finalista): texto orixinal (Araceli Gonda, Marta Lado, Jose Prieto, Diego Rey, Séchu Sende e Artur Trillo).

9. Morgana en Esmelle, de Sarabela Teatro (1 finalista): actor secundario (Fernando Dacosta)

10. A cazola de Lola, de Tanxarina (1 finalista): música orixinal (Ailén Kendelman).

11. Soga e cinsa, de Aporía Escénica (1 finalista): texto orixinal (Diana Mera)

12. Seva me Servabo te, do Centro Dramático Galego (1 finalista): iluminación (Laura Iturralde)

13. Cubo, de Elefante Elegante (1 finalista): espectáculo infantil

14. Hugo, de Os Náufragos Teatro (1 finalista): espectáculo infantil.