Ata 16 espectáculos competirán na fase final dos XXIV Premios de Teatro María Casares

Un total de 16 espectáculos competirán en calidade de finalistas por facerse con algún dos catorce galardóns que se entregarán durante a gala dos XXIV Premios de Teatro María Casares, que este ano se celebrará o xoves 26 de marzo no Teatro Rosalía Castro da Coruña. As quinielas quedan moito máis repartidas que na anterior edición na que foron nove as montaxes finalistas. Así se deu a coñecer onte en Santiago durante a tradicional Festa de Finalistas que tivo lugar na cafetería Lasso do Auditorio de Galicia. No acto representantes das institucións que patrocinan os galardóns do noso teatro, organizados pola Asociación de Actores e Actrices de Galicia (AAAG), entregaron a cada finalista os trofeos e diplomas que os acreditan. Nesta fase destaca a obra Liberto, de Marelas Teatro, que acadou un total de 7 finalistas nas categorías de espectáculo, dirección, adaptación-tradución, actriz protagonista, actriz secundaria iluminación e música orixinal. A producción que xa se sabe que premio poderá lucir é MedidaxMedida, de Producións Teatráis Excéntircas. A adaptación de Shakespeare reúne os tres finalistas a mellor actor secundario que se decidirá entre Víctor Mosqueira, Josito Porto e Santi Romay.

As montaxes Bernarda, de Malasombra Producións, e Fariña, son as outras dúas producións que acaparan máis posibildiades con cinco finalistas cada unha. A obra de Malasombra rexistra 5 finalistas nas categorías de espectáculo, dirección, texto orixinal, actriz protagonista e actriz secundaria. Fariña, de Ainé producións, Undodez e Oqueteño Media, acapara tamén 5 finalistas nas categorías de espectáculo, actor protagonista, música orixinal, iluminación e escenografía. Con 3 finalistas, atópanse seis espectáculos ademáis de MedidaxMedida: O empapelado amarelo, da compañía A quinta do Cuadrante, que aspira aos premios de dirección, iluminación e adaptación/tradución; Despois das Ondas, da compañía ButacaZero, que optará os premios de texto orixinal, maquillaxe e vestiario; Hemos venido a darlo todo, de Voadora, que conta con finalistas para os apartados de maquillaxe, vestiario e música orixinal; Vida de Cans, de Talía Teatro; que competirá nas categorías de texto orixinal, escenografía e maquillaxe e Neorretranca e Posmorriña, do Centro Dramático Galego, a producción da compañía pública fica con tres finalistas para os premios de vestiario, escenografía e actriz secundaria. O meu mundo non é deste reino, de Teatro da Ramboia, competirá na gala dos María Casares por 2 galardóns (dirección e adaptación/tradución).


Finalmente, outros seis espectáculos rexistran 1 finalista: Idiota, de Redrum Teatro, co que Machi Salgado opta a actor protagonista; A compañeira de Piso, de Contraproducións e o Centro Dramático Galego, que competirá no apartado de actriz protagonista con Patricia Vázquez; e Karelu, de Os Náufragos, tamén finalista no apartado de actor protagonista para o traballo de Denis Gómez. Cartoóns, de Producións Teatráis Excéntricas; Lambetadas, de Talía Teatro, e Ummm! Unha comedia musical… para chupar os dedos, de Teatro Avento Producións son os tres espectáculos que unicamente competirán polo galardón ao mellor espectáculo infantil. A gala de entrega, o xoves 26 de marzo, poderá seguirse en directo por Internet a través dos medios que poña a AAAG como xa se fixo o pasado ano.



Repartición de finalistas por montaxes

1. Liberto, de Marelas Teatro (7 finalistas): espectáculo, dirección (Tamara Canosa), adaptación-tradución (Tamara Canosa, María Vázquez), actriz protagonista (Rocío González), actriz secundaria (Cris Iglesias), música orixinal (Lucía Aldao) e iluminación (José Faro ‘Coti’).

2. Bernarda, de Malasombra (5 finalistas): espectáculo, dirección (Jose Prieto), texto orixinal (Jose Prieto), actriz protagonista (Luisa Merelas) e actriz secundaria (Celia González)

3. Fariña, de Ainé Produccións, Undodez e Oqueteño Media, (5 finalistas): espectáculo, escenografía (José Faro ‘Coti’), iluminación (Laura Iturralde), actor protagonista (Sergio Zearreta) e música orixinal (Novedades Carminha, Santi Jul, Iván Laxe e Sergio Zearreta)

4. O empapelado amarelo, de A Quinta do Cuadrante (3 finalistas): dirección (Tito Asorey), adaptación/tradución (Tito Asorey e Melania Cruz) e iluminación (Laura Iturralde)

5. Despois das ondas, de ButacaZero (3 finalistas): texto orixinal (Ernesto Is), maquillaxe (Carlos Pinilla) e vestiario (Carlos Pinilla)

6. Hemos venido a darlo todo, de Voadora (3 finalistas): maquillaxe (Fany Bello), vestiario (Fany Bello) e música orixinal (Hugo Torres, Fernando Epelde e José Díaz)

7. MedidaxMedida, de Producións Teatráis Excéntrica (3 finalistas): actor secundario (Víctor Mosqueira, Josito Porto e Santi Romay)

8. Vida de Cans, de Talía Teatro (3 finalistas): texto orixinal (Cándido Pazó), maquillaxe (Martina Cambeiro) e escenografía (Dani Trillo)

9. Neorretranca e Posmorriña, de Centro Dramático Galego (3 finalista): actriz secundaria (Raquel Espada), escenografía (Marta Pazos) e vestiario (Saturna)

10. O meu mundo non é deste reino, de Teatro da Ramboia (2 finalistas): dirección (María Peinado) e adaptación-tradución (María Peinado)

11. Karelu, de Os Náufragos (1 finalista): actor protagonista (Denis Gómez)

12. Idiota, de Redrum Teatro (1 finalista): actor protagonista (Machi Salgado)

13. A compañeira de piso, de Contraproducións e o Centro Dramático Galego (1 finalista): actriz protagonista (Patricia Vázquez)

14. Lambetadas, de Talía Teatro (1 finalista) espectáculo infantil.

15. Umm! Unha comedia musical… para chupar os dedos, de Teatro Avento Producións(1 finalista): mellor espectáculo infantil

16. Cartoóns, de Producións Teatráis Excéntricas (1 finalista): mellor espectáculo infantil