A organización do encontro Son d'Aldea completou esta semana a publicación en Youtube dos vídeos que recollen a súa décima edición. Desde o pasado mes de xaneiro a entidade publicou as 14 pezas audiovisuais coas actuacións deste proxecto de teatro comunitario que se desenvolveu en setembro de 2021.
Co eixe nos saberes tradicionais, o equipo de intérpretes amadores recrea escenas e conflitos arredor de cuestións como as varas de medir, os usos da auga ou o traballo na aira, canda a situacións xa clásicas da cita de Santiago de Albá como é o encontro con Curuxás.
As pezas foron gravadas de xeito previo ás actuacións ante o público, que en cada edición percorre os vieiros desta aldea de Palas de Rei a atopar as historias do evento. Os vídeos complétanse cun audiovisual que resume a edición do pasado ano.
