Un total de 1.408 espectáculos poderán verse en todos os concellos da provincia da Coruña no marco da Rede Cultural da Deputación Provincial. A entidade deu a coñecer a listaxe de actividades que fan parte deste programa, que conta cun investimento de 1.509.836 euros por parte do organismo.
A iniciativa inclúe propostas escénicas, audiovisuais, música, danza, ou maxia, a incluír 198 películas do programa "Visións", 174 actuacións da modalidade "Lingua a escena", 112 do programa "Alicerce" de cultura non profesional e un total de 924 actuacións de artistas e compañías profesionais. Destas últimas 522 corresponden a obras teatrais, 299 a concertos, 65 a espectáculos de maxia e 38 á danza.
As actividades do programa están cofinanciadas cos concellos en diferentes porcentaxes. Deste xeito, nos de menos 5.000 habitantes a Deputación achega ata un 75% dos custos, unha porcentaxe que vai diminuíndo nas entidades de maior poboación ata un mínimo do 30% nas cidades de máis de 50.000 habitantes.
