A toponimia de Tordoia protagoniza o novo volume de Terra Nomeada

A nova entrega da colección Terra Nomeada analiza un total de 150 nomes de lugares das dez parroquias do Concello de Tordoia, así como diferentes accidentes xeográficos do mesmo. O volume que presenta a Real Academia Galega está asinado por Lidia Gómez e Luz Méndez e fai parte da serie que desenvolve o Seminario de Onomástica da RAG en colaboración coa Asociación Galega de Onomástica, e pode descargarse no web da institución.

As autores abordan no seu traballo nomes como o de Andoio, de orixe descoñecida, que podería estar vencellado "con outros nomes de lugar como Bormoio, en Coristanco, Leiloio, en Malpica de Bergantiños ou mesmo Baldaio, lugar da parroquia homónima, que conteñen todos o sufixo prerromano -io", segundo as autoras.

Noutros, como Bouzamerelle e Bouzarán, as investigadoras detectan a voz prerromana "bouza", que designa un terreo inculto e un segundo elemento que no primeiro dos casos derivaría "do nome de persoa de orixe xermánica Mirellus" e no segundo "pode ser o nome prerromano referido a un accidente do relevo".

Entre os achados que recolle a publicación está a análise sobre o nome do río Dubra, que as autoras relacionan co céltico *dubro- e que significaría "auga, río", un termo que se pode vencellar co "co nome do río Dobra de Asturias ou da cidade de Dover en Inglaterra".