A canle de Youtube da Secretaría Xeral de Política Lingüística acolle desde este 5 de abril as cen pezas que compoñen o proxecto A literatura galega nas súas voces. A Asociación de Escritoras e Escritores en Lingua Galega (AELG) promove esta iniciativa na que se poden ver outros tantos autores e autoras do país a leren framentos significativos das súas propias obras.
Con esta iniciativa, segundo a entidade, "facilítase o acceso directo de toda a cidadanía á creatividade da literatura galega e promóvese a súa dinamización e visualización no ámbito dixital, en especial nos usos no ensino". A colección de vídeos realizouse ao abeiro do Fondo de proxectos culturais en lingua galega Xacobeo 2021-2022.
