Saberes Próximos reúne a "rede viva" do patrimonio inmaterial

Co obxectivo de reunir nun espazo virtual a "rede viva" de quen traballan -recollendo, divulgando, reformulando- sobre o patrimonio inmaterial galego, ven de presentarse Saberes Proximos.gal. Neste novo web constitúese unha base de datos aberta e dixital na que é posible atopar información sobre máis de medio cento de persoas, colectivos e entidades de varios concellos da provincia da Coruña: asociacións, obradoiros artesanais, comunicadoras, investigadoras, artistas, mestras, xestoras culturais. Saberes Próximos, que conta co apoio do programa de Proxectos Singulares da Deputación da Coruña. nace da man de BenCuriosa, empresa de xestión cultural especializada no eido dixital.

Na páxina web que vén de publicarse podemos acceder a esta base de datos, estruturada en fichas, que nos permiten poñerlle nome ás persoas implicadas no coidado do noso patrimonio inmaterial, achegándonos á súa labor concreta, metodoloxía de traballo e motivacións. Unha recompilación na que aparecen figuras que, sendo máis ou menos coñecidas, levan a cabo unha labor indispensable para a preservación de tradicións coma o baile, a música, os entroidos, a artesanía, a literatura, os oficios e os costumes sociais en xeral. A base de datos de Saberes Próximos permite a consulta de tres maneiras distintas: mediante un visor interactivo, a través dun mapa xeolocalizado e mediante unha lista que garante un acceso doado a calquera persoa usuaria.. Ademais de ofrecer un formato máis interactivo, esta presentación busca achegar a web a diferentes niveis de lectura o máis accesible posible para todos os usuarios. Sara Fraga, historiadora e xestora cultural, foi a encargada de mediar e comisariar este proceso de mapeado. Unha sucesión de conversas e fíos que revelaron como "hai tantas maneiras de mirar o patrimonio como xentes que o viven".