Utópicas convida a facer arte de xeito colectivo en Compostela

"Situar a cidadanía de Compostela no centro da produción artística e comisarial da institución e de converter a esta nun lugar de participación, pensamento e acción cultural". Este é o obxectivo de Utópicas, a nova iniciativa que presentan o Auditorio de Galicia e 7H Cooperativa Cultural como "un proxecto experimental que reivindica a importancia da cultura como medio para fomentar vínculos comunitarios e crear espazos de diálogo emancipadores".

O proxecto, que amosará o seus resultados nunha exposición colectiva na Sala Isaac Díaz Pardo do Auditorio de Galicia, promoverá o desenvolvemento colaborativo de cinco accións artísticas, ideadas e executadas pola veciñanza da cidade. Como eixes deste traballo, as entidades promotoras propoñen "explorar e reflexionar creativamente arredor do concepto de territorio como espazo material e simbólico" a través dos eixes de "identidades, feminismos, memoria colectiva, loita social e ruralidades".

Ata o vindeiro 13 de abril está aberto o prazo de presentación de proxectos para desenvolver no seo deste programa. Con posterioridade abrirase unha convocatoria para participar dos equipos que realizarán as iniciativas seleccionadas. Os resultados deste traballo poderán verse no auditorio de Galicia entre os meses de outubro de novembro como unha proposta expositiva que se poderá ver ata o xaneiro de 2023.