Pesqueira no río Ulla. Foto: Proxecto No curso da auga.
O proxecto No curso da auga publicou unha escolma de trinta arquitecturas vinculadas á explotación e aproveitamento dos recursos hídricos da provincia da Coruña, aínda que o catálogo abrangue unhas 2000. Trátase dun ambicioso proxecto que, en palabras dos seus creadores, "é facer fincapé na súa singularidade; no seu valor etnográfico e arquitectónico e na importancia da súa conservación e difusión". O proxecto inventaria muíños e batáns, lavadoiros, fontes e pesqueiras e acompaña cada ficha con fotografía aérea en drone que compón unha chamativa estética entre as augas, a natureza e a pedra. O equipo de traballo está dirixido por Susana González (Consultarte) e a coordinación científica está a cargo de Carlos Quintáns. O Museo Virtual María José Jove alberga a exposición virtual.
