Luísa Villalta será homenaxeada como Nosa Señora das Letras de 2022

Este sábado 5 de marzo a Plataforma de Crítica Feminista A Sega daba a coñecer o nome da autora que será homenaxeada no Día das Galegas nas Letras o vindeiro 15 de agosto. Luísa Villalta foi a escolleita cando se fan 18 anos do seu falecemento e recibe o título de Nosa Señora das Letras de 2022. Entre os méritos da autora, a organización destaca "a súa loita pola lingua, que trataba con coidado e meticulosidade", "a súa implicación co tecido social e feminista da Coruña", o ter realizado "unha creación rica e multidisciplinar" e mais o seu labor en organizacións como o a Asociación de Escritoras/es en Lingua Galega e o Foro da Cultura.

Ao longo da súa vida, Villalta publicou nove títulos de poesía, catro de narrativa, cinco obras de teatro e diferentes traballos de ensaio. En 2003 obtivo o Premio Espiral Maior de Poesía, e a súa figura deulle nome ao premio de normalización da Universidade da Coruña e mais ao premio de proxectos culturais pola igualdade da Deputación da Coruña.

Desde A Sega, segundo anuncian, "comprometémonos a respectar a súa obra tal e como ela a pensou; a non deixar que a súa persoa quede baleira por comentarios ao redor do seu físico ou outras banalidades machistas que oculten e desvirtúen o seu traballo".