O IV Día das Galegas nas Letras, no que a plataforma de crítica feminista A Sega homenaxea autoras galegas terá como protagonista a escritora compostelá Patricia Janeiro. A xornada de homenaxe celebrarase, como é habitual, o vindeiro 15 de agosto coa presenza da homenaxeada. Janeiro ten publicadas as novelas Caixa de mistos e A perspectiva desde a porta, coa que foi finalista ao Premio Xerais.Segundo explican desde A Sega, a conmemoración pretende "celebrar a figura dunha muller que contribuíse de forma sobranceira á cultura en xeral e á literatura en particular".
A coincidir co anuncio, A Sega publicou o manifesto deste ano, titulado Unha carta de amor aos puntos suspensivos no que reivindica "a todas aquelas cuxos textos foron omitidos, cuxas transcricións literais non chegaron ao final da cita. A todas aquelas que tiveron que padecer que mentres uns atopan os recoñecementos, o lugar nos libros de texto ou os máis altos honores cunha ou dúas obras publicadas, outras escapen polos mesmos motivos ata dos andeis das librarías, xa non digamos a atención da crítica, o canon e a fama literaria".
