Pazo de Lourizán. Fonte: Deputación de Pontevedra
A sección segunda da Sala do Contencioso-administrativo do Tribunal Superior de Xustiza de Galicia aceptou o recurso que presentara a Deputación de Pontevedra logo de que a Consellería de Medio Ambiente, Territorio e Vivenda lle requirise aá entidade provincial a realización de obras de conservación no Pazo de Lourizán. O fallo determina que lle corresponde á Xunta abordar estes traballos no marco do convenio polo que o pazo, os seus xardíns e as instalacións anexas lle foron cedidas pola Deputación.
A sentenza difundiuse este martes 9 de febreiro, e na semana anterior a Consellería de Medio Rural iniciou xa traballos no pazo por valor de 208.000 euros. As tarefas que se abordaron son a reposición da cuberta, limpeza de baixantes, impermeabilización de carpintaría ou renovación de luminaria, e agárdase que estean rematadas no segundo trimestre do ano.
A Deputación de Pontevedra, pola súa banda, denunciou que, ao seu ver, o investimento é insuficiente polo estado no que se atopa o conxunto, e considera necesario un investimento de 14 millóns de euros para unha axeitada recuperación.
