Estaleiro Ciprián en Oute. Fonte: GALP Costa Sostible
A antiga carpintaría de ribeira Ciprián, situada en Tabilo, Outes, rehabilitarase para acoller un museo dedicado a este oficio. O Concello de Outes anunciou a posta en marcha do proxecto para facer deste edificio "un centro de interpretación e museístico que poña en valor a carpintería de ribeira para un uso cultural e educacional". Para isto conta coa colaboración económica do Grupo de Acción Local e Pesqueira Costa Sostible, que achegará un 55 por cento do medio millón de euros que suma o orzamento do proxecto.
A rehabilitación prevé recuperar a totalidade das construcións que conforman este estaleiro tradicional, ademais de amañar a súa rampla de acceso ao mar e crear un posto de información sobre o conxunto. O futuro museo acollerá catro salas, unha de recepción na que se abordará a importancia desa carpintaría de ribeira en Outes, outra polivalente, dotada de elementos multimedia, unha de exposición permanente coas ferramentas do oficio e unha última dedicada ao motor da marca Ayón.
As técnicas construtivas da carpintaría de ribeira contan coa declaración de Ben de Interese Cultural de carácter inmaterial por parte da Xunta desde 2017.
