Elisa Patiño. Fonte: Álbum de Galicia.
O 12 de outubro de 1913 Elisa Patiño facía historia ao ser a primeira muller da historia de Galicia en pilotar un aeroplano. Nesa xornada púñase aos mandos do Blériot doutro pioneiro da aviación galega, José Piñeiro, e realizaba un voo sobre Sanxenxo. O Álbum de Galicia do Consello da Cultura Galega reivindica agora esta figura cunha breve biografía, fotografías, documentación sobre ela e ligazóns para saber mais encol da súa vida.
Patiño, nada en Pontevedra, conseguiría poucos anos despois o título de aviadora, logo de acreditar cincuenta horas de voo, converténdose na primeira muller do Estado con este título. A coñecida como Chichana, destacou tamén pola súa sensibilidade artística e as súas capacidades musicais, ademais de desenvolver un activo labor filantrópico ao longo da súa vida. A aviadora faleceu en 1919 por mor da epidemia de Gripe Española.
