Publicamos o ensaio Breve apunte para unha futura historia do cómic galego

Hai xa dez anos, o crítico de cómic Breixo Harguindey elaboraba, no marco da materia Cultura e sociedade galega que impartía Rexina Rodríguez Vega na Universidade Autónoma de Barcelona, un traballo pioneiro encol da historia da nosa BD. Breve apunte para unha futura historia do cómic galego é un texto de 29 páxinas no que se realiza un primeiro achegamento a esta materia, incluíndo unha bibliografía e unha cronoloxía, así coma o texto do catálogo O cómic galego (1973) ou unha escolma de textos de Reimundo Patiño encol da novena arte. Agora, atendendo ao seu interese e co permiso do autor, presentamos esta obra no soportal BD en formato pdf.