Localizan unha nova capela medieval na igrexa de Oia

Unha nova estrutura de época medieval apareceu estes días no interior da igrexa de Oia, onde os arqueólogos que son parte do equipo da intervención exhumaron os muros dunha antiga capela trasaltar do tempo da fundación da igrexa, no século XII. O equipo arqueolóxico sinala que ata o momento apareceron os muros e descoñécese se preservará pavimento. Non é o único dos achados localizados durante esta intervención de restauración do edificio. Na cimentación da torre barroca, o equipo tamén localizou unha estancia abovedada que conectaba a sacristía vella coa primeira torre da igrexa. A restauración tamén está devolvendo a altura orixinal do edificio coa retirada de entullo.