A Real Academia Galega explica os nomes de lugar da Pontenova

Está xa dispoñible no web da Real Academia Galega a versión dixital do sétimo volume da colección Terra Nomeada, dedicada a explicar a toponimia do noso país. A filóloga Xulia Marqués Valea asina esta publicación que analiza os nomes das 11 parroquias e das 102 entidades de poboación do Concello da Pontenova. Ademais, a obra explica a orixe de nomes de accidentes importantes deste territorio como son o o río Eo e a serra do Pousadoiro, e mais o antigo topónimo de Miranda, que se aplicou antigamente ao río e ao conxunto deste territorio.

Segundo destaca a RAG, "algúns dos topónimos analizados son únicos en toda Galicia" como é o caso de Neipín, O Puiteiro ou Brandiz. Esta última, de orixe xermánica, vincúlase ao nome de orixe Brandaricus, mentres Neipín podería derivar do hipotético nome persoal de procedencia latina Naepinus ou estar relacionado co verbo aneipar. Segundo esta última posibilidade, o topónimo podería referirse "a un lugar que acolle e, seguindo esta liña argumentativa, a un sitio protexido, abrigado", segundo suxire a investigadora.

Tamén a orixe de Puiteiro é descoñecida, aínda que a autora vencéllao ao substantivo outeiro e sinala que "posiblemente estea emparentado co apelativo piouteiro que figura entre o léxico do galego de Asturias co significado lugar máis alto con respecto aos terreos que están arredor".