De Valdeorras a México. Terra a Nosa! Pequena biografía de Florencio Delgado Gurriarán é o título da obra que acaba de presentar Lela Edicións e que estrea as publicacións dedicadas ao homenaxeado no Día das Letras Galegas 2022. A obra, con ilustracións de Tania Solla, achega ao público máis novo a biografía e fragmentos do traballo poético do autor de Valdeorras, a percorrer os seus espazos vitais, as súas inquedanzas culturais e as perspectivas políticas que o acompañaron.
Pola súa banda, Galaxia anunciou o seu plan editorial arredor do homenaxeado para o comezo deste ano. As reedicións de Bebedeira, Galicia infinda ou O soño do guieiro acompañaranse dun traballo de Xesús Alonso Montero que percorrerá a vida de Gurriarán e que se complementará cunha antoloxía do autor. A firma viguesa adianta ademais que recuperará o traballo de Ricardo Gurriarán sobre Florencio Delgado, Vida e obra dun poeta valdeorrés, republicano e galeguista, publicado orixinalmente en 1999.
