Imaxe da exposición de Lois Cid en Lugo.
O Pazo de San Marcos, en Lugo, acolle desde este 20 de decembro a exposición do traballo gañador do IX Premio Galicia de Fotografía Contemporánea. Estruturas de fusión, de Lois Cid, amosa a reflexión deste autor sobre "os materiais cos que o ser humano transforma o terreo, e, ao mesmo tempo, estuda a implicación deste na creación e modificación da paisaxe contemporánea".
A exposición, que conta con Vítor Nieves como curador, pode verse ata o vindeiro 31 de xaneiro e foi acompañada por varias intervencións que Cid realizou en espazos públicos locais "co obxectivo de pór en dialogo as súas creacións cos espazos de construción e/ou derrubamento que hai actualmente na cidade".
O resultado destas intervencións pode verse nun vídeo na propia sala que acolle a exposición, e preséntanse como "micro-exposicións efémeras que alongan a Sala do Pazo de San Marcos, rachando a idea do Cubo Branco, e levando á cidade a súa obra, na procura non só de novos emprazamentos museísticos improvisados, senón tamén de novos públicos".
A exposición está organizada pola Asociación Outono Fotográfico co apio da Vicepresidencia da Deputación de Lugo e da Consellería de Cultura, e con posterioridade itinerará durante dous anos polas salas de exposicións de Afundación de todo o país.
