Raúl Santos gaña o XXXIII Premio Torrente Ballester de narrativa galega

Coa novela 'Cornucopia', o ribeirense Raúl Santos Ageitos ven de gañar o o XXXIII Premio Torrente Ballester da Deputación da Coruña na categoría de narrativa en galego. Na categoría en español resultou gañadora a novela titulada 'Ni luz ni llanto', que unha vez aberta a plica resultou ser da autoría de María Cureses de la Vega, de Madrid. Ambos recibirán un premio en metálico de 12.000 euros. Case 500 obras concorreron nesta edición dos prestixiosos premios literarios da Deputación Provincial da Coruña: 88 novelas en lingua galega e 403 en lingua castelá. Un xurado conformado pola xornalista Montse Dopico, os xornalistas e escritores Xesús Fraga e Nazareth López e os escritores María Marco e Eduardo Losada decidiron sobre o premio de narrativa galega. Para a categoría de narrativa en castelá o xurado estivo conformado por Domingo Villar, Dores Tembrás, Lucía Taboada, Ignacio Martínez de Pisón e Clara Escajedo.



Na acta do fallo, o xurado indica sobre 'Cornucopia' que "é unha parodia moi ben construída, e cargada de ironía, sobre o papel do escritor e a literatura". No mesmo informe tamén salienta que "se apoia sobre nunha estructura fragmentaria na liña da literatura posmoderna, pero sen perder nunca o fío nin o ritmo; cunha narrativa moi fluída e con vocación de establecer unha complicidade coa persoa lectora, pero sin por iso ser compracente". A novela é a primeira obra literaria do seu autor e acadou o apoio unánime do xurado.

Por outra banda a novela 'Ni luz ni llanto' de María Cureses, de Madrid, foi proposta como gañadora por maioría do xurado. Na acta salientan "a riqueza expresiva da novela e a técnica narrativa coa que achega o tema da violencia contra a muller en Ciudad Juarez, nunha obra que fala da inxustiza, o duelo e a vinganza".