A Deputación da Coruña convoca unha liña de apoio a festivais de arte urbana

Ata o vindeiro 11 de decembro os concellos da provincia da Coruña poden solicitar as axudas para a organización de festivais arte urbana que acaba de convocar a Deputación Provincial. O Boletín Oficial da Provincia deste 30 de novembro recolle esta liña, que apoia a realización de "festivais de arte pública urbana na modalidade de pintura mural" e que poderán solicitar concellos que xa desenvolvan proxectos deste tipo, cun mínimo de dúas edicións consecutivas e que vaian incorporar un mínimo de tres obras exteriores de gran formato na nova xeira. As axudas para cada concello teñen un máximo de 35.000 euros e a convocatoria distribuirá 150.000 euros entre as entidades solicitantes.