Peza de Nöwmada de Lía González.
A Asociación Ensaia, creada para promover e visibilizar o talento no noso país acaba de dar a coñecer o fallo da súa primeira bolsa, dedicada ao desenvolvemento da carreira persoal de artistas. Este apoio foi para Lía González, creadora afincada en Entrimo, que o colectivo cualifica como "un dos talentos artísticos máis prometedores da nosa comunidade, cun claro potencial internacional no seu traballo".
González recibirá un total de 6.000 euros repartidos en doce pagos mensuais, ao que se suman encontros con mentores, acompañamento e apoio na divulgación do proxecto e no acceso a potenciais clientes. A bolsa, ao igual que a propia asociación, finánciase en base ás achegas dun cento de doantes independentes e de patrocinios.
A creadora está a dedicar este apoio aos proxectos Pathart, no que realiza visións artísticas dos tecidos do corpo humano en colaboración cunha patóloga, e mais nöwmada, unha proposta na que se crea cor a partir de código e de momentos de inspiración.
