A Xunta abre un concurso para unha nova licenza de televisión privada en Galicia

O Diario Oficial de Galicia publicou hoxe as bases para rexir un concurso público para a "prestación do servizo de comunicación audiovisual de ámbito autonómico e titularidade privada", é dicir, unha canle adicional de ámbito galego de capital privado. Esta licenza concederase por quince anos. Entre os requisitos formulados pola Xunta, está o de dispoñer de estudios de produción propia no ámbito de cobertura da licenza cunha "estrutura informativa de ámbito galego formada por profesionais da información". A nova televisión deberá emitir 32 horas semanais de programas orixinais, "fomentando a difusión de servizos televisivos de ámbito autonómico" e deberá empregar a lingua galega de acordo aos termos previstos pola lei de normalización lingüística, nun 50% dos programas de produción propia.