A Biblioteca de Galicia celebra os seus dez anos cunha exposición

Hai xa dez anos que abría as súas portas na Cidade da Cultura, en Santiago de Compostela, a Biblioteca de Galicia. A conmemorar esta efeméride, a entidade inauguraba este 26 de outubro na súa sede 10 anos da Biblioteca de Galicia. As pegadas dunha década, unha exposición bibliográfica que amosa setenta pezas destacadas dos fondos que acumulou neste tempo.

A exposición, que permanecerá aberta ata o 31 de maio de 2022, percorre a través de oito seccións obras desde o século XV ata a actualidade, a comprender tanto libros, como prensa, revistas, mapas, fotografías, carteis, debuxos e mesmo creacións audiovisuais e sonoras. Segundo adianta a entidade na presentación desta iniciativa, a mostra recolle de xeito particular os comodatos e as doazóns que recibiu desde a súa posta en marcha. O Fondo Amancio Landín Carrasco, o Fondo Bibliográfico Abanca, o Fondo Agustín Sixto Seco, a Colección Isaac Díaz Pardo ou a Colección Núñez de las Cuevas, entre outros moitos, están presentes na conmemoración.

Tamén no marco da celebración destes dez anos, o escritor Juan Tallón e Dores Tembrás conversarán este venres 29 de outubro sobre a obra Días contados. A sesión fecha o ciclo de encontros Dez anos, dez autores, dez libros que achegou diferentes faladoiros literarios ao centro ao longo deste 2021.