O legado de Emilia Pardo Bazán amósase na Coruña

A recuperación e presenza da obra e vida da escritora Emilia Pardo Bazán no ano do centenario do seu pasamento segue a activarse con forza, sobre todo na súa cidade natal, A Coruña. O Museo de Belas Artes ven de inaugurar a exposición "Legado Emilia Pardo Bazán no Museo de Belas Artes da Coruña", unha mostra patrocinada pola Consellería de Cultura, Educación e Universidade que trata de dar a coñecer os obxectos pertencentes ao legado da familia de Emilia Pardo Bazán por medio dunha singular intervención arquitectónica instalada na sala dedicada á pintura de finais do século XIX e principios do século XX do Museo.

No museo poderán verse obxectos artísticos e cotiáns doados por María de las Nieves Quiroga y Pardo Bazán, filla da autora, e María Esteban-Collantes y Sandoval, irmá da nora de Emilia Pardo Bazán. Entre os legados da filla poden contemplarse retratos da autora feitos por Xesús Corredoyra en 1915 e por Joaquín Vaamonde en 1896, un conxunto de 215 moedas que abranguen desde o período romano ata o século XIX, e obxectos persoais como unha pluma, un misal e unha escribanía, entre outros. Pola súa banda, María Esteban-Collantes y Sandoval deixoulle no seu testamento ao museo obras vencelladas a Emilia Pardo Bazán, como un tapiz dos séculos XVI-XVII e un retrato feito por Vaamonde en 1897 á condesa de Torre de Cela, nora da escritora. A instalación complétase con outros fondos da propia colección do Museo, que permiten recrear o que foi a vida coruñesa da época da célebre escritora e os ambientes e personaxes que tiñan relación con dona Emilia.