Novos documentos amplían datos sobre a época máis descoñecida de Rosalía de Castro

A investigadora Sagrario Abelleira presentou os resultados dunha investigación realizada durante este ano, no que puido acceder ao expediente matrimonial de Rosalía de Castro e Manuel Murguía, conservado no Arquivo Histórico Diocesano do Arcebispado de Madrid. Ata o momento unicamente se coñecía a acta matrimonial. No expediente, cun total de 43 folios, figuran importantes datos que achegan claves para a época máis descoñecida da vida de Rosalía, a súa infancia e mocidade. Para comezar, que a autora naceu o 23 de febreiro de 1837 e non o 24, como se consideraba ata agora. Pero o expediente permite confirmar información que ata o momento figuraba borrosa, como o recoñecemento de Rosalía como filla natural pola nai Teresa de Castro cando Rosalía tiña seis anos. De feito, na partida de bautizo do 24 de febreiro de 1837 do Hostal dos Reis Católicos, Rosalía de Castro figuraba como "filla de pais incógnitos". Os documentos permiten tamén saber dalgunhas residencias de Rosalía de Castro en Madrid non coñecidas ata agora.