O riso busca o seu agosto

Malia que se tapen as bocas os risos escóitanse e os sorrisos vense tamén nos ollos. En Vilagarcía e na Coruña comezan esta semana dúas das citas de referencia coa alegría para toda a familia: Festaclown e Manicómicos. Do 16 ao 21 de agosto na capital da Arousa sur o Festaclown volverá a ofrecer a alegría do circo e a cultura clown con esta cita xa veterana. O parque de Santa Margarita, na Coruña, será o sitio onde durante catro días entre o 12 e o 15 deste mes, concentrarase a oferta circense da XIXª edición do Manicómicos.

Festaclown estende cunha previa
Para ir quecendo motores o 12 de agosto comezarán as actividades previas do Festaclown de Vilagarcía de Arousa. Ese mesmo día terá lugar a celebración dos 20 anos de clown de Fran Rei e Pedro Brandariz cunha escolma dos seus mellores momentos cómicos. O día 13 o grupo de teatro Clámide celebrará os seus 40 anos de historia co seu particular Enfermo Imaxinario e o día 16 as rúas de Vilagarcía encheranse de ambiente e música con Troula e Somdolilá. Un ano máis, as protagonistas do Festaclown serán as mellores compañías galegas: Pedras de Cartón, Circo Chosco, Dani García, A Vela Circo, Sue Moreno ou Assircópatas. Completan a programación grandes nomes a nivel estatal e internacional como Tchyminigagua, Bergamotto Clown, Mayte Guevara, Rudi Dudi ou Eddy Eighty. O compromiso social segue sendo o signo distintivo do Festaclown, con actividades como o CheckPoint Clown de Pallasos en Rebeldía ou os espectáculos de narración oral pola igualdade e a diversidade, a cargo de Larraitz Urruzola e Xarope Tulú.

Circo en Santa Margarita
No espazo de anfiteatro do parque coruñés de Santa Margarita terán lugar as actuacións das compañías e artistas desta edición do Manicómicos que é apta para todos so públicos e que se ofrece en todas as franxas de horarios, desde o mediodía ata a noite. Rolando Rondinelli abrira o programa este xoves ás 12 hrs., cunha peza de teatro xestual e tap-dance. Na oferta do evento están tamén o pallaso Simone Romanó, a compañía coruñesa Circompakto, Antón Coucheiro e o seu cabaré portátil, Fausto Giori, a compañía Al grano, Tanxarina Títeres co Titiricircus por partida doplicada no programa e a compañía Circo Deriva. A edición rematará o domingo coa Gala Manicómicos, entre as 19.00 e as 21.00 horas.