Un filme sobre Ian Gibson abrirá o XVIII Festival de Cans

Desde este 15 de xullo están dispoñibles na web as primeiras entradas para asistir á XVIII edición do Festival de Cans. A longametraxe Donde acaba la memoria, debut na dirección do vigués Pablo Romero-Fresco arredor da figura do hipansita Ian Gibson abre o programa da nova xeira. O propio Gibson participará no evento, que por segundo ano consecutivo se traslada ao mes de setembro, entre os días 1 e o 4. Segundo destaca a organización, ao igual que na anterior edición "as medidas de distancia, seguridade, e sobre todo protección dos veciños serán fundamentais" por mor da pandemia de Covid-19 con ocupacións limitadas e distancia social.

O primeiros 200 abonos para asistir ao festival, 100 para as sesións de mañá e outros tantos para as de tarde, póñense á venda cun desconto de máis do 30% sobre o prezo oficial, e inclúen canda ás entradas a camiseta, o catálogo do Festival e unha chapa de edición limitada. Tamén abren este 15 de xullo as reservas para asistir ás estreas de Donde acaba la memoria e de Beiras, vivir dúas veces, proxeccións que serán de balde pero limitadas a 75 prazas cada unha.

A Asociación Arela, que organiza o festival, presentaba na mañá do 14 de xullo a nova edición do evento en Santiago de Compostela. Como é habitual, o evento conta cun cartel realizado pola firma de deseño Nikis Galicia que tamén se deu a coñecer na rolda de prensa.