O festival de Cans abrirá coa proxección de 'La isla de las mentiras'

A estrea en pantalla grande do filme La isla de las mentiras, antes de que a súa distribución chegue ás salas de cinema, servirá para abrir a XVIIª edición do Festival de Cans, que terá lugar do 2 ao 5 de Setembro. A longametraxe da debutante Paula Cons, comparte ademais protagonismo este ano coa homenaxe a Chano Piñeiro e a súa figura, que o festival prepara para conmemorar o vixésimo quinto aniversario do seu pasamento. Á figura do creador de clásicos do audiovisual galego coma Mamasunción ou Sempre Xonxa adicáselle o cartaz do certame deste ano, a través da figura icónica do seu personaxe Caladiño. Parte da programación da XVIIª edición do Festival de Cans presentouse onte en Santiago , na tenda NikisGalicia, cuxo equipo deseña cada ano os cartaces do Festival e apoia a súa celebración. Nesta edición, a seguridade e, de maneira moi especial, trazar un ‘escudo protector’ sobre os maiores de Cans, é o primeiro obxectivo do Festival, que reducirá considerablemente o seu aforo e eliminará os concertos nocturnos, para adaptarse ás medidas de seguridade

A presidenta da Asociación Cultural Arelas, Keka Losada, explicou que "foi un gran esforzo chegar ata aquí. Queremos facer un certame moi especial, con prudencia e responsabilidade, con moi poucas entradas esta vez". Malia as dificultades, Losada lembrou que "hai moitas persoas que apoian Cans ano tras ano e que sabemos que van estar aí". As entradas estarán limitadas a 200 únicas entradas de mañá e outras 200 de tarde. Só sairán á venda en packs con camisola, con prezos que van variar entre os 20 e os 25 euros, e que incluirán tamén accesos á coloquios e ás actuacións musicais para o público sentado. Nesta edición só poderán acceder ás proxeccións, coloquios na Leira, e actuacións persoas que teñan unha entrada, debido á necesidade de ter un control de capacidade. Todas as persoas deberán cumprir as normas vixentes de uso de mascara, hixiene e distanciamento. Sobre o cartaz, Fabián Moldes, director de Produción de Nikkis Galicia, explicou que é unha homenaxe a Chano Piñeiro, a través do personaxe emblemático de Caladiño, “que representa á Galicia máxica e soñadora, coa súa bicicleta voadora”.