Retírase a cápsula que protexía o Pórtico da Gloria

A Catedral de Santiago comezou a retirar do Pórtico da Gloria a protección de madeira que limitaba a penetración de humidade e contaminación química derivada das obras de reforma dos diferentes espazos do templo. O proceso será gradual: agora se rebaixou a altura da cápsula de madeira ata 1'80 e o 22 de xullo finalizará coa súa total retirada. Aínda así, a catedral manterá a limitación de acceso ao Pórtico "para evitar o incremento dos índices de vapor de auga na atmósfera interior", pero tamén para mellorar a experiencia e "facilitar a apreciación cultural do patrimonio. A masificación conduce á banalización". Con todo isto, a catedral regulará o acceso "sexa de pagamento ou gratuíto", ademais doutras medidas de conservación.