Lenda en Penedo Gordo. Ilustración: MeliMolita (Manuela Elizabeth Rodríguez)
En febreiro de 2018 deuse a coñecer a noticia da aparición, en Vilardevós, dun abrigo rupestre que preservaba aínda un tipo de arte prehistórica nada frecuente en Galicia: pintura esquemática. E en 2019 tamén se puido documentar outro abrigo rupestre no Castelo de Lobarzán, durante o transcurso dunha intervención arqueolóxica máis ampla. Agora, baixo a dirección da profesora da Universidade de Vigo Beatriz Comendador, membro do grupo GEAAT, o equipo Premedia publicou unha visita virtual aos dos sitios arqueolóxicos "con múltiples recursos que permiten somerxerse no coñecemento destes xacementos sen causar impacto humano neles e salvando as dificultades de acceso a eles". As visitas virtuais permiten visitar en 360º os reducidos espazos nos que se preservan as pinturas, analizalas con fotografías tratadas dixitalmente e mesmo mergullarse na tradición oral sobre eses espazos da man de GIFS elaborados por MeliMolita (Manuela Elizabeth Rodríguez), ademais de acceder á documentación científica producida nestes anos.
