A Biblioteca Nacional abre en Madrid a grande exposición sobre Pardo Bazán

O grande proxecto expositivo que conmemora o centenario do falecemento de Emilia Pardo Bazán inaugúrase este 8 de xuño, coa presenza das máximas autoridades do Estado, na Biblioteca Nacional de Madrid. Emilia Pardo Bazán. O reto da modernidade está organizada, por Acción Cultural Española, a Xunta de Galicia e a Comunidade de Madrid, en colaboración coa Real Academia Galega (RAG) e o Concello de Coruña, ademais da propia Biblioteca Nacional. A mostra estará aberta ao público entre o 9 de xuño e o 26 de setembro, e a do 22 de outubro ao 18 de decembro poderá verse no Kiosko Afonso da Coruña.


Comisariada pola historiadora e biógrafa da autora Isabel Burdiel, o proxecto "quérelle achegar luz ao crebacabezas" que é Pardo Bazán, "demostrando que a súa obra e vida responderon e déronlle cabida a todos os retos e a todas as inquedanzas da modernidade na España da Restauración (1875-1923) e na Europa do seu tempo", segundo explica o folleto da exposición, dispoñible en castelán e en galego.

A presentación do proxecto destaca a autora como "unha das grandes escritoras europeas da súa xeración" e destaca o seu labor como novelista, autora de relatos, xornalista cultural "e ás veces política, crítica e historiadora". Lembra ademais que "como empresaria fundou unha revista, Nuevo Teatro Crítico e unha editorial, Biblioteca de la Mujer. O único eido no que non tivo éxito, como lles aconteceu a tantos outros escritores de entón, foi no complexo mundo do teatro". Do mesmo xeito, destaca en particular a súa aposta polo feminismo, que acompañou o seu carácter pioneiro "na introdución en España dos debates europeos sobre o naturalismo, a literatura rusa, o modernismo ou o decadentismo".

A coincidir coa exposición, a Biblioteca Nacional fai públicos nas redes diferentes contidos e publicacións dixitalizadas da autora.