O aRi[t]mar reivindica as pontes literarias tendidas polo escritor José Viale Moutinho no seu premio especial

O certame aRi[t]mar fixo público o premio especial do xurado á Embaixada da amizade galego-lusófona, desta volta concedido ao xornalista e escritor José Viale Moutinho, como "ponte entre Galiza e Portugal e impulsor do continuo lingüístico e cultural que representa a Lusofonía e como verdadeiro embaixador da Galiza en Portugal e de Portugal na Galiza". O intelectual, de orixe madeirense, vive no Porto e leva a cabo unha intensa actividade xornalística e literaria, así como de xestión de colectivos culturais. Sempre destacou polo esforzo en facer visible a cultura galega en Portugal, e divulgou a literatura galega contemporánea, coas figuras de Neira Vilas, Celso Emilio Ferreiro, Manuel María, e sendo o primeiro tradutor de Méndez Ferrín ao portugués. Vinculado ao noso país tamén publicou o ensaio Introdução ao nacionalismo galego.