Pontevedra celebra o seu Salón do Libro co lema Emerxencia Literaria: os libros salvan o planeta

Un cartel da ilustradora viguesa Aída Alonso presenta a vixésimo segunda edición do Salón do Libro de Pontevedra. O evento bota a andar este 23 de abril cun programa no que, no canto dun país convidado, conta con colaboracións de quince países a través das Escolas Unesco, que achegaron as súas colaboracións á canle de Youtube do evento. Ademais do Pazo da Cultura, as actividades desta xeira desenvolveranse tamén ao aire libre na veciña Illa do Covo e mais por diferentes parroquias do Concello onde unha furgoneta, achegará libros e contacontos entre outras propostas. Ademais, as rúas da cidade acollerán como novidade a Orbil Parade unha serie de roteiros literarios a partir de oito estatuas da mascota do evento.

Entre os nomes que participan desta edición, a organización celebrará unha exposición dedicada a Kiko da Silva e Helena Vilar "que por mor do peche do ano pasado non puideron recibir a homenaxe merecida". Ademais, desenvolveranse faladoiros en formato presencial e en streaming con Miguelanxo Prado e Pablo Prado, Ledicia Costas, Mariña Maceiras ou Montse Fajardo. Desde o mundo escénico poderá verse a estrea Ás para Alex espectáculo de teatro e monicreques de Baobab Teatro.

No programa inclúense varios espectáculos exclusivos como Non o ves? Salvemos o planeta, dirixido Marcelo Dobode, que abrirá o Salón, ou RockLab e o seu Rock para salvar o planeta, que fechará a iniciativa. Tamén o Seminario Permanente de Jazz, Lucía Aldao e María Lado presentarán o espectáculo A auténtica vida salvaxe, deseñado en exclusiva para o Salón.