De "Simón di" a "Afonso di"

Para acompañar a exposición "Afonso X e Galicia", o Consello da Cultura Galega convocou unha game jam (competición de desenvolvemento de xogos) ao redor das Cantigas de Santa María e o tempo do rei. O gañador resultou ser o xogo O mester, unha divertida proba de habilidade musical que explora o patrimonio musical das cantigas e anima, con humor, as figuras representadas no principal códice no que se conserva, o Códice Rico de El Escorial. “O noso xogo é unha especie de Simon dice cunha volta de torca” afirma Carlos Balado, creador xunto con Pablo García de los Salmones do xogo “O mester”. Explica que “é un xogo musical cos personaxes que saen nas “Cantigas de Santa María” no que queríamos que as ilustracións cobrasen vida”. Na súa decisión, os membros do xurado destacaron que o proxecto “conta con ambientación musical e visual moi coidada e toques humorísticos que o converten nunha proposta atractiva que permite amosar o potencial das Cantigas de Santa María para seren incorporados a formatos e linguaxes do presente”. Os dous gañadores son alumnos do Máster en Deseño, Desenvolvemento e Marketing de Videoxogos da Universidade da Coruña e recibirán un premio de douscentos cincuenta euros.