A USC libera para descarga o libro 'Na procura da noite' de fotografía do ceo nocturno

A Universidade de Santiago de Compostela ven de dispoñer para libre descarga o libro xa descatalogado Na procura da noite: fotografando o ceo nocturno , publicado orixinariamente no ano 2018. O volume recolle unha selección dos mellores fotógrafos do ceo nocturno de Galicia no que cada un achega a súa ollada particular para esta obra, que nos advirte que por riba das nosas cabezas hai unha beleza na que cómpre reparar. Jorge Mira e Salvador Bará coordinan esta publicación na que contribúen coas súas fotografías. A obra reúne fotografías sobre a lúa e as constelacións e outras nas que a propia localización terrestre forma parte da composición da imaxe aparecendo paraxes coma os Ancares, A Veiga, Fisterra, Cabo Vilán, Corme, os Canóns do Sil e moitas outras. Nove fotógrafos asinan este volume: Óscar Blanco Varela, Ana María García Suárez, Daniel Llamas Gómez, Daniel Lois Otero, Alfredo Madrigal Fariña, Pablo Martínez Alemparte, Fernando Rey Daluz, Ängel Rodríguez Arós e Alba Rodríguez Mosquera. O libro está dispoñible para descarga en formato PDF ou tamén para consulta en liña.

Esta obra atópase baixo unha licenza internacional Creative Commons BY-NC-ND 4.0. Calquera forma de reprodución, distribución, comunicación pública ou transformación desta obra non incluída na licenza Creative Commons BY-NC-ND 4.0 só pode ser realizada coa autorización expresa dos titulares, salvo excepción prevista pola lei. Pode acceder Vde. ao texto completo da licenza nesta ligazón: https://creativecommons.org/licenses/by-nc-nd/4.0/deed.gl